إنك تشوف واحد مكتئب فتبدأ تلومه ع اللي هو “عامله في نفسه” وكأنه اختيار وتبدأ تستعجب هو مكتئب ليه.. مش بس كده، لكن هتلاقي نفسك تلقائياً بتعِد له كم الحاجات الحلوة اللي عنده اللي تستاهل يروَّق عشان يستمتع بيها..
طب خلينا الأول نتفق إن الإكتئاب حاجة و”القريفة” أو “المتضايق شوية” حاجة تانية خالص..
فيه جملة مأثورة شهيرة بتقول :
When you’re sad everything matters, When you’re depressed, nothing does
والفكرة إن المكتئب غالباً مش زي السينما ما صورتلنا.. الصورة النمطية بتاع المكتئب اللي ماشي متدلدل وقاعد لوحده طول الوقت أو بيحاول يربط حزام ف السقف ويشنق نفسه.. ده كليشيه زيه زي كليشيه “المدمن” اللي تحت عينه إسود وبيمسح مناخيره ف كُمُه بالضبط.. ده كلام هجايص!
ممكن المكتئب يكون أي حد بتشوفه و بتكلمه كل يوم.. شخص عادي لكن مكتئب
مكتئب وبيتكلم.. مكتئب وبيخرج, مكتئب وبيروح الشغل, مكتئب وبيجيب التارجت
مكتئب وبيجاملك في فرحك، بيحضر عيد ميلادك. ممكن يكون مكتئب وأب، مكتئبة وأم وزوجة..
إذن المكتئب مش مشلول ولا قاعد ف جزيرة بوحده، لكن بيعمل كل حاجة ومش لازم يبان عليه لكن فيه شوية حاجات العلماء أجمعوا إنها علامات مميزة للإكتئاب وهي -والله أعلم-:
-المكتئب هتلاقيه شايف كل حاجة ف حياته فيها مشكلة أو مش ماشية مضبوط.
-مش مبسوط ولا متفائل بحاجة.
-ممكن يعيط بدون سبب منطقي أو لسبب بسيط ممكن يكون مش متعود يتأثر به كده (موقف روتيني عادي، مشهد في فيلم، حاجة مش لاقيها أو مش عارف يعملها،..)
-النوم بالليل بصعوبة (أرق متكرر) والصحيان الصبح بمعجزة
-صعوبة في اتخاذ القرارات البسيطة ( ألبس إيه، أكل إيه، ..)
-مهمة دي: المكتئب ممكن يبدأ يشك في حبه للطرف الآخر (حبيب ، خطيب، زوج) أو يشكك في حب الطرف التاني له.
-المكتئب بيحس ان فيه حيطة إزاز بينه وبين العالم.
-إضطرابات في الهضم دي كليشيه بس بتحصل
-المكتئب بيستسهل الحلول اللي بتتضمن الانسحاب، الاستغناء، البُعد.. وغيرها من الحلول السلبية. المكتئب مش عاوز يواجه ومش قادر.
الاكتئاب مش إختيار.. وبالتالي الشفاء منه مش بقوة الإرادة ولا كبسولتين هيتاخدوا بشوية مية.. الاكتئاب مرض نفسي زي أي مرض عضوي كلنا معرضين له.. ولو الاكتئاب علاجه إنك تفكر المكتئب بالحاجات الحلوة اللي ف حياته مكنش أشهر الفنانين والرياضيين يصابوا بالاكتئاب اللي ممكن يوصل للإدمان أو الانتحار والأمثلة كتير..
احنا بنعيش في مجتمع ضاغط..
مطلوب مننا نتكلم ونضحك طول الوقت، لازم تعمل لنفسك، لازم تتكلم تقول حاجة، لازم توصل لأهدافك ولما توصللها تتبسط بيها، تتبسط قوي، لازم تحقق أحلامك وأحلام غيرك فيك..
لغاية ما بنتعب من القوة..
بنتعب من دور السعيد.. غير القابل للكسر..
انا بس عاوزة اطلب طلب من أي حد بيقرا الكلام ده..
إرحموا بعض..
إرحموا اللي قلوبهم وجعاهم ونفسهم مكسورة.
