إعلان

إعلان

مرور القليوبية على طريقة ” أضرب المربوط يخاف السايب “

0 1٬086

مرور القليوبية بيطبق المثل القائل “اضرب المربوط يخاف السايب ” عندنا فى محافظة القليوبية يتبع المرور اسلوب عجيب وغريب فى مطاردة الموتوسيكلات الغير مرخصة وده بصراحة مجهود يشكروا علية والمفروض اننا كلنا نشتغل لهم مخبرين ونبلغهم بأى موتوسيكل نشوفة من غير لوحات معدنية
اية العجيب والغريب فى الموضوع ده ؟
هاقول لحضراتكم هو انه سايب الشارع مليان موتوسيكلات بدون لوحات معدنية وغير مرخصة ويقودها أطفال وشباب اقل من 18 عاما ومن غير مبالغة انا شخصيا اعرف تلاميذ فى الصف الثانى الابتدائى بيقودوا موتوسيكلات .
مرور القليوبية بدل ما يبحث عن سماسرة الرخص اللى بيعملوا رخص من على المقاهى الملاصقة لإدارات المرور وطبعا مديرين الوحدات عاملين نفسهم مش واخدين بالهم والتنفيذ بيتم عن طريق امين الشرطة بتاع الكمبيوتر اللى بيجرى اختبار الإشارات وده اختبار ” فنكوش ” تم اختراعه علشان كل اللى بيتقدم للحصول على رخصة يدخلة ولو مش معاه واسطة يرسب فيه وبناءا علية يدخل مدرسة المرور ومدرسة المرور دى قصة طويلة هى كمان مش مجالها الان .
مناسبة هذا الكلام اية ؟ ان فى 3 وقائع حدثوا بسبب الموتوسيكلات الغير مرخصة وسنعرضهم الان وليس لغرض النقض او للتقليل من المجهود الجبار الذى يقوم به مرور القليوبية وضباطة وافراده ولكن علشان نقول لهم ان مش كل شغل المرور موتوسيكلات غير مرخصه وان الشوارع والطرق مليانين موتوسيكلات من غير ارقام وعلى كل الاحوال الواقعة الاولى : حملة نزلت مدينة قها وبالتحديد فى جراج اسفل كوبرى قها الجديد لجراج الموتوسيكلات نزلت الحملة ضبطت 50 موتوسيكل بدون لوحات وحدث مشادات خفيفة هناك بين افراد الحملة وبعض المواطنين وتم فضها واخذ الموتوسيكلات مع العلم ان ده جراج محدد الحدود وله ابواب والدخول بالبطاقة ورسمى ما علينا .
الواقعة الثانية: بردوا فى قها ولكن المرة دى فى قسم شرطة قها دخل ضابط شرطة برتبة كبيرة اوى فى مديرية الامن وراى موتوسيكلين من غير لوحات ومن غير ما يسأل عن اصحابهم حملهم فى” بوكس” وخدهم معاه المديرية .
الواقعة الثالثة: فى بنها فى جراج سيارات بجوار المحكمة الجديدة حملة مرور بتلف فى الشوارع شاهدت الجراج وكأنهم اول مرة يشاهدوا الجراج ده ودخلوا علشان يضبطوا عدد من الموتوسيكلات به من غير لوحات وحدثت مشادات تدخل فيها بعض القيادات بعد ان اكدوا ان الجراج خاص بالعاملين بالمحكمة وليس بالمواطنين وتركت الحمله الموتوسيكلات ومشيت فارغة اليدين .
ما نريد قولة فى النهاية هو ان الشوارع مليئة فى القرى والمدن بالموتوسيكلات ليس فى الجراجات فقط او المصالح الحكومية وهاقولك فين مثلا حضراتكم انزلوا كورنيش بنها ليلا شوفوا الشباب اللى بتتسابق بالموتوسيكلات او الشباب اللى بتتسابق على الطريق الزراعى السريع ليلا بعد الساعة 12 وبيعملوا اكروبات بالموتوسيكلات على الطريق
بلاش كل ده اضبطوا موضوع رخص القيادة اللى ريحتة فاحت فى مرور طوخ وشبرا الخيمة والخانكة وبنها كمان .

حكيم

أخبار قد تهمك

قد يعجبك ايضا